Fáilte chuig Deireadh a chur le Claonadh Inscne sa Ríomheolaíocht agus sa Chibearshlándáil
Tá an tionscnamh seo, arna mhaoiniú go bródúil ag Clár Fionnachtana Fhondúireacht Eolaíochta Éireann, tiomanta do dheireadh a chur le bacainní inscne i réimsí na ríomheolaíochta agus na cibearshlándála. Tabharfar an eolaíocht, na healaíona agus na daonnachtaí le chéile ar bhealach nuálach chun troid in aghaidh claonadh inscne agus steiréitíopaí a chuireann drogall go minic ar mhná óga tabhairt faoi ghairmeacha sna réimsí ríthábhachtacha seo.
Acmhainní do Mhná i nGairmeacha ETIM
Léigh scéalta faoi theacht aniar, nuálaíocht agus éachtaí ceannródaíocha.
Deireadh a chur le Claonadh Inscne sa Ríomheolaíocht agus sa Chibearshlándáil
Agus muid ag baint úsáid as Fealsúnacht do Leanaí (P4C) agus as scéalaíocht, cothaímid meon fáis agus cuirimid le scileanna smaointeoireacht chriticiúil, ag cur ar chumas cailíní a bheith ina gceannairí amach anseo sa ríomheolaíocht agus sa chibearshlándáil. Trí cheannairí spreagúla ban a thaispeáint sna réimsí seo, cruthaímid naisc mhothúchánacha a spreagann uaillmhian agus a sholáthraíonn eiseamláirí cumhachtacha don chéad ghlúin eile. Táimid ag obair le chéile chun todhchaí chuimsitheach san eolaíocht agus sa teicneolaíocht a mhúnlú.
Tionscadail Ghaolmhara
Is cuid de ghluaiseacht níos mó é Deireadh a chur le Claonadh Inscne sa Ríomheolaíocht agus sa Chibearshlándáil chun mná óga a chumhachtú trí thaithí phraiticiúil tharraingteach sa teicneolaíocht. Trí shineirgí a chruthú le tionscadail ghaolmhara amhail First Lego League, Zero Days Capture the Flag, agus Laethanta Foghlama Dúshlánbhunaithe, méadaímid tionchar agus cuirimid le deiseanna cailíní códú, róbataic, cibearshlándáil, agus réiteach fadhbanna a iniúchadh ar bhealaí spraíúla agus dinimiciúla. Tá na tionscadail seo fite fuaite le prionsabail na Spriocanna Forbartha Inbhuanaithe (SFIanna) agus an Oideachais Saoránachta Domhanda (GCE), agus spreagtar rannpháirtithe aghaidh a thabhairt ar dhúshláin shochaíocha agus ar shaincheisteanna fíorshaoil leis an teicneolaíocht. Trí smaointeoireacht chriticiúil agus freagracht shóisialta a chothú, cuirimid timpeallacht thacúil agus chuimsitheach ar fáil ina bhforbraíonn cailíní an mhuinín agus na scileanna a theastaíonn chun dul i ngleic le fadhbanna práinneacha domhanda agus ina n-éireoidh go geal leo mar cheannairí comhfhiosacha sóisialta teicneolaíochta sa todhchaí. Táimid ag tiomáint iarracht chomhchoiteann an chéad ghlúin eile de cheannairí ban in ETIM a spreagadh agus a ullmhú.
Ócáid chuimsitheach oideachais ba ea Lá Foghlama Comhroinnte Cibirchéillí inar díríodh ar an gcibearshlándáil agus ar an Oideachas Saoránachta Domhanda (GCE). Reáchtáladh é i mí Aibreáin 2024 agus bhí gníomhaíochtaí tarraingteacha éagsúla ar siúl ar an lá, lena n-áirítear dúshlán Zero Days Capture the Flag, áit a raibh deis ag rannpháirtithe dul i ngleic le saincheisteanna GCE cibeardhomhanda agus fíordhomhanda.
Tá an Intleacht Shaorga (IS) ar cheann de na nuálaíochtaí is mó claochlú dár linne. Cé go bhfuil buntáistí móra le IS do dhaoine aonair agus don tsochaí, tá impleachtaí móra aige i dtaca leis an bpríobháideachas, leis an eitic agus leis an tslándáil.
Cuireann an tIonad ADAPT clár ceardlainne modúlach saor in aisce ar fáil chun cabhrú le scoláirí
idirbhliana tabhairt faoin intleacht shaorga go rathúil agus go sábháilte.
Thug an Lá Foghlama Dúshlánbhunaithe, a reáchtáladh i mí Dheireadh Fómhair 2023, deis do scoláirí smaoineamh ar shaincheist chriticiúil shochaíoch na cibearshlándála agus an nasc atá aici leis na Spriocanna Forbartha Inbhuanaithe. Ba é aidhm an imeachta sin scoláirí a fhorbairt; cur leis an tuiscint ar thionchar na cibearshlándála maidir le gnéithe éagsúla den saol agus an ról ríthábhachtach atá aici maidir le forbairt inbhuanaithe a bhaint amach.